A nova directiva para promover a recollida e reciclaxe de pilas e baterías na UE quedou onte aprobada polo Parlamento Europeo. Segundo esta norma, os Estados membros deberán contar con sistemas de recollida a partir de 2008, ademais de establecer como obxectivo para 2012 recuperar polo menos o 25% das pilas.
Unha das principais demandas do Parlamento, a de que os distribuidores que fornezan pilas ou acumuladores portátiles sexan os responsables de recuperar os residuos sen cobrar por iso, foi finalmente aceptada. Así, refugar pilas e baterías non suporá ningún custo para o usuario.
Os puntos de recollida implantaranse en 2008. Paralelamente, realizaranse campañas de información cuxo custo soportarán tamén os produtores. Na actualidade, soamente seis Estados membros posúen un sistema de recollida de pilas e baterías: Alemaña, Austria, Bélxica, Francia, Países Baixos e Suecia. Segundo esta norma, os Estados membros deberán alcanzar os seguintes índices mínimos de baterías e pilas recollidas: o 25% como moi tarde seis anos despois da entrada en vigor (é dicir, en 2012), e o 45% dez anos despois da aprobación da directiva (é dicir, en 2016).
Todas as pilas recollidas someteranse a tratamento e reciclado mediante sistemas que respecten a saúde, a seguridade e a xestión de residuos. Neste caso, os obxectivos mínimos son lograr reciclar o 65% de pilas e acumuladores de plomoácido, o 75% das de niquelcadmio, e o 50% dos demais residuos de pilas e acumuladores. Ademais, os Estados membros prohibirán a comercialización de todas as pilas e acumuladores, fosen ou non incorporados a aparellos, que conteñan máis de 0,005% de mercurio en peso; e as que conteñan máis de 0,002% de cadmio. As únicas excepcións son os dispositivos de emerxencia e alarma, os equipos médicos ou as ferramentas eléctricas inalámbricas.
Así mesmo, o texto acordado establece que os Estados membros con fabricantes establecidos no seu territorio promoverán a investigación e fomentarán melloras do rendemento ambiental global das pilas e acumuladores ao longo de todo o seu ciclo de vida útil, así como o desenvolvemento e a comercialización de modelos con menores cantidades de sustancias perigosas ou con sustancias menos contaminantes.
