As partículas en suspensión son un dos principais contaminantes atmosféricos en zonas urbanas, ademais de atoparse entre os que maior impacto teñen na saúde da poboación. Nas cidades españolas, entre un 40% e un 60% da contaminación provocada polo denominado material particulado atmosférico débese ao tráfico.
Este dato corresponde a un estudo do Ministerio de Medio Ambiente coordinado polo Instituto de Ciencias da Terra Jaume Almera, en Barcelona, que servirá de asesoramento a este departamento e ás comunidades autónomas para que poidan responder os requirimentos que establecerá a futura normativa da UE sobre partículas en suspensión, actualmente en proceso de revisión.
Os resultados indican que a contaminación por material particulado atmosférico nas cidades está causada maioritariamente polo tráfico, sobre todo polos motores diesel, que chegan a producir ata catro veces máis partículas de carbono que os de gasolina. Así, un motor diesel dun vehículo mediano emite entre 20 e 30 microgramos de partículas por quilómetro percorrido, fronte aos menos de cinco microgramos dun motor de gasolina. No entanto, a eficiencia enerxética dos diesel é maior.
Unha posibilidade para reducir as emisións dos diesel é o uso de filtros de partículas regenerables, que reteñen ata o 90% das mesmas. Esta tecnoloxía úsase xa nalgúns vehículos privados e en cidades europeas e estadounidenses para diminuír as emisións do transporte público e escolar e dos vehículos de recollida de residuos.
