Novas probas achegadas pola maior investigación internacional dos últimos 50 anos nas rexións polares, onde é máis evidente o fenómeno do quecemento da Terra, volven pór de manifesto que o cambio climático é aínda máis grave do que se cría.
Uns 10.000 científicos de máis de 60 países levaron a cabo durante os dous últimos anos unha campaña de investigacións científicas intensivas no Ártico e a Antártida. Os resultados obtidos destacan que o quecemento no continente xeado está moito máis estendido do que se pensaba e que o xeo de Groenlandia fúndese cada vez máis rápido. “Parece seguro que tanto o manto de xeo de Groenlandia como o da Antártida están a perder masa e, en consecuencia, elevando o nivel do mar, e que o xeo de Groenlandia está a perderse cada vez máis rápido”, sinala o informe.
As novas evidencias superan en gravidade mesmo a algúns datos do Grupo Intergobernamental contra o Cambio Climático (GICC), que por exemplo sinalaba que fronte ao quecemento xeral a Antártida oriental estaba a arrefriarse.
Durante as investigacións tamén se confirmou que a extensión do xeo mariño perenne no Ártico no verán reduciuse en aproximadamente un millón de quilómetros cadrados, ata alcanzar a súa dimensión máis reducida desde que comezasen os rexistros por satélite.
Rexións máis sensibles
Aínda que o impacto do quecemento é planetario, hai rexións máis sensibles que outras a este fenómeno. Así, segundo os expertos, a Península Ibérica viuse afectada o quecemento case tres veces máis que o conxunto do planeta nos últimos 50 anos. E zonas do sur de Arxentina e Chile tamén se están quentando moi rapidamente.
O aumento do nivel dos mares é unha das manifestacións do cambio climático que máis preocupan aos expertos polas graves consecuencias que pode ter para algúns países e illas. A Organización Meteorolóxica Mundial (OMM) indica respecto diso que suporá a entrada de auga salgada nos acuíferos que se empregan para o consumo e o regadío, e fenómenos como os tsunamis serán máis devastadores.
