O sector dos transportes foi o culpable do 28% das emisións de CO2 que a Unión Europea rexistrou en 2004, sendo os vehículos de turismo os maiores emisores. No entanto, compañías como Nissan, Suzuki, Volvo BMW ou Volkswagen continúan fabricando os seus últimos modelos sen asumir o seu papel protagonista na loita contra o cambio climático.
A pesar do acordo que a Asociación Europea de Fabricantes de Automóbiles alcanzou coa Unión Europea en 1998 para proceder a unha redución gradual das emisións de CO2, séguense sucedendo os novos modelos que desaproveitan o combustible provocando a liberación de cantidades de CO2 superiores á necesarias.
As empresas fabricantes terán que pisar o acelerador e mellorar a eficacia do consumo de combustible e, probablemente, pensar na pila de hidróxeno como alternativa.
