“O sistema de produción da roupa ten que cambiar si ou si, e debe facelo pronto”, urxe Mariña López, presidenta da Asociación de Moda Sustentable de España (AMSE). Gobernos e administracións deben lexislar nese aspecto, pero nos consumidores está a clave para que cambie tamén o modelo de consumo. Coñecer e optar por alternativas máis sustentables é imprescindible para reducir o impacto da moda no noso planeta, así como non tirar nunca as pezas ao lixo, depositándoas no colector branco específico para iso ou entregándoas nunha ONG ou en tendas de roupa que a recollen.
? Comprar menos roupa e utilizala máis tempo
Na actualidade, o número de veces que nos pomos unha peza antes de desfacernos dela é moi baixo. É dicir, infrautilizamos a roupa. En Europa unha peza emprégase de media unhas 95 veces ata que se refuga, un 36 % menos que hai 15 anos, advirte o informe ‘Unha nova economía téxtil: redeseñando o futuro da moda’, da Fundación Ellen MacArthur. Pero a situación aínda é peor noutras rexións. En China, unha peza úsase de media unhas 62 veces, e en EE.UU., 34.
Ademais, se o número de veces que nos pomos unha peza fose o dobre, as emisións de gases de efecto invernadoiro desta industria reduciríanse un 44 %, segundo o informe do Parlamento Europeo ‘Impactos ambientais da industria téxtil e da moda’. Pensar antes de comprar unha peza en se imos utilizala o suficiente pode axudarnos a decidir se adquirila ou mantela no noso armario.
Tradicionalmente, as tempadas de moda estaban vinculadas aos ciclos estacionales, polo que había entre dous e catro cada ano. Na actualidade, as grandes cadeas de roupa alteraron eses ritmos, o que crea a necesidade ao consumidor de renovar as súas pezas de forma máis frecuente para seguir as tendencias. Pero ir á última e ter o armario a rebordar de roupa non teñen por que ir da man.
Cada vez xorden máis alternativas que animan aos consumidores a reutilizar, reciclar ou reducir o seu consumo, sen que iso leve deixar de vestir o que queiran. Desde fomentar unha compra máis crítica e madurada, pasando pola reparación das pezas, a súa personalización ou a súa eliminación responsable, son moitas as opcións que existen. Pero debemos ter presente que o mellor que podemos facer, en calquera caso, é comprar menos e utilizar a nosa roupa durante máis tempo.
? Doar roupa para a súa reciclaxe e comprar de segunda man
Para reducir o consumo de roupa e aumentar a vida útil das nosas pezas, reciclar preséntase como unha gran opción, pois iso reduce a presión sobre as novas materias primas, así como o problema da xestión de residuos. Nesa liña traballan Koopera e AltrapoLab, dúas cooperativas sociais que fomentan a reciclaxe téxtil creativo para darlle unha nova vida á roupa que xa temos. “O noso obxectivo é visibilizar a necesidade de reducir o impacto ambiental e social da industria téxtil convencional e ofrecer alternativas, como recrear e reciclar pezas ou achegar outros modelos de consumo como intercambios de roupa”, explica Natalia Casteláns, coordinadora.
Nese sentido, doar a nosa roupa e comprar pezas que xa tiveron outro dono produce un impacto moi positivo. Organizacións como a ONG Fundación Humana recuperan e xestionan cada ano toneladas de roupa cun dobre beneficio:
- Por unha banda, conséguese un efecto ambiental, pois reduce a xeración de residuos e contribúe a retardar o cambio climático. Por cada quilo de roupa recuperado e non incinerado déixanse de emitir á atmosfera 3,169 kg de CO2 , segundo un estudo da Comisión Europea. “A reutilización e a reciclaxe téxtil durante o pasado ano representaron o aforro de 55.689 toneladas de CO2 á atmosfera”, detalla Joan Carles Montes, responsable de comunicación da fundación. Ademais, comprar moda de segunda man evita o consumo de millóns de novas pezas.
- Doutra banda, a recuperación e a xestión de pezas ten un beneficio social. “A recollida de roupa supón a creación de postos de traballo inclusivos, estables e de calidade. Ademais, os recursos obtidos destínanse a proxectos sociais”, conclúe Montes.
? Alugar roupa en situacións especiais
O aluguer pode ser outra alternativa para deixar atrás o costume de usar e tirar. Existen distintas iniciativas dirixidas mesmo a bebés e nenos, embarazadas e empresas que alugan roupa para eventos especiais. Este exemplo de economía colaborativa ofrece moitas vantaxes, como o aforro, a variedade de opcións ou o beneficio ambiental pola reutilización das pezas. Cada vez que se aluga unha déixase de fabricar outra e, por tanto, elimínase o impacto ambiental ligado á súa produción.
