O Observatorio de Cambio Global de Sierra Nevada, desenvolvido pola Consellería de Medio Ambiente da Xunta de Andalucía neste espazo natural en colaboración coa Universidade de Granada (UGR), presentou a súa metodoloxía de seguimento dos procesos de cambio climático, “co que se converte no primeiro espazo protexido español que se dota de todos os protocolos de xestión para a avaliación, minimización e adaptación aos impactos do cambio climático”, destacou a Xunta de Andalucía. O Observatorio de Sierra Nevada constitúe unha das 27 reservas da biosfera mundiais seleccionadas pola Unesco para analizar o cambio climático no planeta.
A elaboración e edición das metodoloxías de seguimento en Sierra Nevada permitiron a fixación de 48 protocolos adaptados aos criterios da estratexia internacional GLOCHAMORE (Cambio Global en Rexións de Montaña), auspiciada pola Unesco. O Observatorio de Sierra Nevada dótase así dun sistema de traballo de validez internacional que cobre todos os aspectos considerados claves pola comunidade científica para avaliar os efectos do cambio global en rexións de montaña, explica a Xunta andaluza.
En total, obtéñense no espazo natural 130 variables diferentes en aspectos como a climatoloxía, cuberta de neve, os sistemas acuáticos, os cambios na química atmosférica, as enfermidades emerxentes, repercusións sobre a biodiversidade, avaliación da xestión, produtividade primaria e fluxos de carbono ou socioeconomía.
“A análise destes datos permite xa avaliar algunhas das consecuencias do quecemento global nestas montañas”, adianta o Goberno andaluz. O Centro Andaluz de Medio Ambiente (CEAMA), da UGR, concluíu que no últimos dez anos houbo unha redución duns 12 días na duración media da neve natural na pista de esquí. Tamén desde o CEAMA estableceuse un modelo hidrolóxico para o espazo natural no que se observa un aumento de dous graos nas temperaturas que provocará en 2050 un descenso do 45% na cantidade de neve caída, así como a súa desaparición case un mes antes.
