A Universidade Politécnica de Madrid (UPM) patentou un sistema que, a través de radiacións electromagnéticas, acelera o crecemento do céspede e prevén o dano por xeadas. Vicente González, catedrático da Escola Universitaria de Enxeñaría Técnica de Telecomunicación da UPM e creador desta técnica, afirma que podería aplicarse en campos de fútbol e en lugares con céspedes de importante valor económico ou histórico.
O novo sistema é unha alternativa aos procesos utilizados actualmente para acelerar o crecemento da herba, baseados na fertilización química e o uso de fortes niveis de rega. Segundo a Universidade, estes procedementos “expoñen problemas de arificación de raíces e exceso de palla, que poden levar a necesidade de replantar o céspede”. Ademais de evitar estes problemas, a UPM afirma que o uso da radiación electromagnética “permite, de forma simultánea, a prevención do dano por xeadas”.
A técnica en cuestión consiste en someter ao céspede a unha irradiación de ondas electromagnéticas, de magnitude suficiente e cunha frecuencia comprendida entre 1 e 100 Ghz, para provocar a aceleración do metabolismo das plantas e demais microorganismos que compoñen o céspede e a súa contorna viva.
Desta forma mellora a aireación e penetración da auga no terreo, e a eliminación de obstrucións aos nutrientes. Tamén se favorece a conversión rápida da materia orgánica en abono beneficioso, así como o desenvolvemento do plantón e a súa consolidación, e a resistencia do céspede.
Protección fronte ás xeadas
Outra aplicación do novo procedemento é como sistema de protección fronte ás xeadas invernais. Pola vibración molecular da auga producida nos elementos irradiados, chan e a propia atmosfera, é posible manter e elevar a temperatura respecto da existente no exterior.
A Politécnica sinala que isto é especialmente rendible para os céspedes usados en eventos deportivos, que deben permanecer en perfecto estado todo o ano. Actualmente, a maioría dos estadios de fútbol teñen instalados fíos térmicos no céspede ou recorren ao seu recubrimento con plásticos para evitar que se xee.
