O Executivo central aprobou en Consello de Ministros a normativa que regula a alimentación de aves rapaces necrófagas con subproductos animais. A nova regulación adecua a idade de recoñecemento dos animais bovinos destinados á alimentación desta especie animal co sistema revisado de vixilancia da Encefalopatía Esponxiforme Bovina (EBB). Segundo informou o Ministerio de Medio Ambiente e Medio Rural e Mariño (MARM), a partir de agora só será necesario realizar unha proba rápida de diagnóstico aos cadáveres da especie bovina maiores de 36 meses, “o que reducirá o número de mostraxes e mellorará a eficiencia da utilización de recursos materiais e humanos”.
A Unión Europea (UE) ten establecidas unha serie de disposicións para a prevención, o control e a erradicación de determinadas encefalopatías esponxiformes transmisibles, entre as que sinala que aqueles Estados membros que puidesen demostrar, con arranxo a determinados criterios, a mellora da súa situación epidemiolóxica, mediante a presentación dunha análise de risco global, poderían solicitar unha revisión dos seus programas anuais de seguimento da Encefalopatía Esponxiforme Bovina (EEB).
Guiándose por esta normativa, España enviou a súa solicitude para a revisión do devandito programa o 9 de setembro de 2008, no que se puña de manifesto que a situación epidemiolóxica había mellorado notablemente, como así corroboraron expertos da Comisión e a Autoridade Europea de Seguridade Alimentaria. Desta forma, a Comisión Europea (CE) autorizou ao noso país que revisase o programa anual de vixilancia de EEB, o que permitiu a elevación da idade obrigatoria para a realización das análises de EEB en todas as subpoblaciones obxecto de vixilancia.
Este cambio do programa tivo a súa consecuencia na alimentación das aves necrófagas, xa que unha das fontes máis habituais de alimento para estas aves son os bovinos nados en España que morreron nas explotacións gandeiras, nos cales a partir de agora, cando vaian ser utilizados para alimentar ás aves necrófagas, deberán ser analizados a partir dos 36 meses de idade, no canto dos 24 meses actuais, explicou o MARM.
A nova normativa contribúe, ademais, a que se manteña a debida seguridade na aplicación da excepción permanente á que se acollen os países mediterráneos e que permite alimentar as especies necrófagas con cadáveres de rumiantes, “excepción sen a cal estaría gravemente comprometida a supervivencia destas especies no noso país”, sinalou o departamento dirixido por Elena Espinosa.
