A comunicación entre as mans libres e o móbil establécese de forma inalámbrica, mediante o estándar Bluetooth, popularizado nos computadores persoais e que xa soportan gran variedade de modelos de teléfono móbil de todas as marcas. Por tanto, non é necesario sacar o móbil do peto ao entrar no coche.
Desde a área de mercadotecnia de Inprotecnología, empresa importadora e representante da marca Parrot en España, destácase como principal novidade que a pantalla reproduce a de cada móbil, mantendo os fondos de pantalla, animacións, melodías, listaxe da axenda, etc.
É compatible con case todos os modelos de móbil Bluetooth existentes no mercado. Ademais, os enxeñeiros de Parrot actualizan constantemente o software do aparello para garantir a compatibilidade cos novos móbiles que vaian aparecendo no mercado.
En Inprotecnología afirman que o mercado de mans libres vive un novo boom grazas ás campañas de seguridade da Dirección Xeral de Tráfico e a próxima introdución do carné por puntos. Falar polo móbil sen mans libres mentres se conduce pode supor unha multa de 300 euros e, a partir de xullo, a retirada de 3 puntos no carné.
GPS
O sistema tamén se integra coas axendas persoais (PDA), os móbiles Symbian e os sistemas GPS, nos que pode actuar como receptor do sinal. Esta característica mereceulle o pasado 9 de xaneiro o premio “Best in” Show do Consumer Electronics Show das Veigas na categoría de automóbil. O premio concédeo o grupo de interese especial Bluetooth (SIG), unha asociación comercial con fins non lucrativos integrada por preto de catro mil membros, algúns tan destacados como IBM, Intel, Ericsson, Microsoft, Motorola, Nokia ou Toshiba.
O resto das características son as xa habituais nestes dispositivos. A marcación por voz recoñece ata 150 nomes, que han de ser gravados na primeira ocasión polo usuario para que o sistema poida recoñecelos.
Os controis de menús e axenda pódense integrar no satélite de mandos da radio que vai no volante e está coordinado co equipo de música que se silencia ao recibir ou realizar unha chamada.
Así mesmo, mellorouse o sistema de recoñecemento de voz que evita a maioría de interferencias producidas por outros ruídos que poida haber no vehículo.
