A crise pasou unha factura moi elevada ao sector automobilístico en 2008. Segundo datos de fabricantes (Anfac) e vendedores (Ganvam), durante o pasado ano matriculáronse 1.161.176 turismos e todoterreos, un 28,1% menos respecto das 1.614.835 unidades contabilizadas en 2007, o que supón o maior descenso na historia deste mercado. Trátase ademais do volume de vendas máis baixo da última década.
Só en decembro, as vendas do mercado automobilístico español rexistraron o segundo maior descenso mensual da súa existencia, cunha caída do 49,9% e un volume de matriculacións de 72.377 unidades, fronte ás 144.441 do mesmo mes de 2007. “A confianza do consumidor viuse lastrada pola escalada da taxa de desemprego e a menor renda dispoñible das familias”, sinala Anfac. A iso hai que sumar a forte restrición dos créditos para a compra de vehículos.
Os fabricantes advirten ademais de que se as condicións do mercado non cambian en 2009, deixáronse de matricular en dous anos máis dun millón de turismos. “Isto dá unha idea da gravidade da situación actual”, apunta.
Caída xeneralizada
A demanda de particulares e de empresas non alquiladoras caeu un 48,4% en decembro, finalizando o ano cun retroceso do 30,3%, mentres que as adquisicións efectuadas por compañías de aluguer rexistraron un descenso de máis do 63% o mes pasado e do 13,3% no conxunto do ano.
Por tipo de vehículos, os descensos máis acusados corresponden a monovolúmenes grandes, con 16.538 unidades matriculadas (-59,3%); todoterreos grandes, con 7.459 unidades (-55,3%), e aos automóbiles de luxo, con 2.987 unidades (-50,3%).
O 69% dos coches comercializados en 2008 eran de motor diesel, fronte ao 31% de cota para os de gasolina. En 2007, os diesel concentraron o 71% das vendas e os de gasolina, o 29% restante.
Por rexións, os descensos máis acusados producíronse en Murcia, con 26.447 unidades vendidas (-41%); Canarias, con 43.950 unidades (-39,5%), e Baleares, con 31.921 unidades (-36,5%).
