O sector do motor en España leva varios anos perdendo traballadores incesantemente. O caso máis recente é o da planta de Delphi en Puerto Real (Cádiz), cuxos traballadores están a loitar polos seus postos de traballo. No últimos seis anos máis de 3.000 españois foron despedidos das súas empresas por mor das chamadas deslocalizacións de multinacionais estranxeiras no sector de compoñentes do automóbil. Unha cifra que aumentará nos próximos meses a 5.000 traballadores, se se fai efectivo o peche anunciado pola compañía americana e o traslado da súa produción a Polonia e a India.
O movemento de factorías cara aos países do Leste ou cara ao norte de África, onde a man de obra é máis barata e as materias primas atópanse mais preto, aumentou considerablemente, e seguirao facendo. Segundo un informe elaborado pola consultora Pricewaterhouse Coopers, os fabricantes de automóbiles en todo o mundo trasladarán unha parte da súa produción no próximos cinco anos a Europa central e oriental. A consultora estima que estas compañías investirán no cambio das súas factorías uns 4.560 millóns de euros.
O sector da fabricación de compoñentes para o automóbil é un dos máis afectados por esta práctica empresarial. Na decisión de mover unha fábrica a outro país inflúen, ademais de aspectos como o baixo custo da man de obra, outros moi variados, como unha lexislación ambiental máis permisiva ou beneficios fiscais.
Con todo, o informe de Pricewaterhouse advirte de que “en moitos casos non é a mellor opción” e débense estudar os motivos que impulsan a instalar a fábrica nunha nova localización. Por exemplo -di a consultora- “non ten moito sentido trasladarse a unha zona con salarios baixos se non se emprega moita man de obra”. Tamén hai que valorar que a “dificultade de achar man de obra cualificada fai que, cando se atope, os soldos suban”.
O informe engade que o fabricante debe aumentar os seus gastos coa creación de novas instalacións ou fábricas, xa que cada vez hai menos factorías de automóbiles nos países do Leste e sinala que a produtividade en Europa central e oriental é inferior á de EE.UU. ou Europa occidental.
