Un total de 97.000 unidades dos modelos Citroën C1 e Peugeot 107, que comparten a plataforma co modelo Aygo da firma xaponesa Toyota, deberán pasar revisión por un defecto no pedal do acelerador, segundo un comunicado difundido polo seu fabricante, o grupo automobilístico francés PSA Peugeot-Citroën.
O defecto detectado en diferentes modelos de Toyota e de PSA consiste en que o pedal do acelerador pode quedar atrancado ou tardar demasiado tempo en retornar á súa posición orixinal cando deixa de pisarse. PSA sinalou que esta chamada a revisión é parte do seu compromiso co mantemento da calidade dos seus produtos e resaltou que esta medida é similar á realizada pola corporación xaponesa en Europa e en Estados Unidos e que afectou a un total de 4,1 millóns de vehículos de oito modelos diferentes.
Os automóbiles de Citroën e Peugeot que se viron involucrados nesta campaña fabrícanse de forma compartida con Toyota e representan en torno ao 10% dos Peugeot 107 e Citroën C1 que circulan polas estradas europeas. A compañía gala sinalou que os clientes que posúan un dos vehículos afectados por esta campaña de revisión europea serán informados nun breve período de tempo a través dunha notificación escrita.
