Polo menos un 30% dos accidentes de tráfico débense á fatiga. Esta é a conclusión principal dun estudo do Real Automóbil Club de España (RACE) e a Asociación Nacional de Fabricantes de Bebidas Refrescantes Analcohólicas (ANFABRA), organizacións que levan a cabo unha campaña destinada a previr o cansazo ao volante.
Esta campaña itinerante, que agora mesmo se atopa en Guipúzcoa, trata de convencer aos condutores de que beber un refresco axuda a previr o cansazo e a somnolencia en desprazamentos longos de automóbil.
Con esta iniciativa viaxan dous simuladores de condución, onde os interesados poden experimentar a sensación de conducir con máis ou menos fatiga e ver os resultados nunha viaxe virtual.
Genoveva Sánchez, responsable de comunicación de ANFABRA, di que non se trata dunha campaña de mellora de vendas de refrescos. “Non somos unha marca, senón todo un sector que se preocupa e traballa pola seguridade viaria, colaborando con este proxecto”, afirma.
Sánchez explica os beneficios de beber un refresco cando se conduce moitos quilómetros: “Alivia e prevén a fatiga. Achega glicosa ao cerebro e mellora o rendemento de todos os sentidos cando se van a pasar moitas horas ao volante”.
Fai fincapé nos datos que se extraen do estudo que realizaron con axuda do RACE. As respostas dos 2.180 condutores, de todas as idades e de ambos os sexos, entrevistados falan de somnolencia nun 80% e perdas de concentración en sete de cada dez condutores, ademais de excesivo parpadeo e molestias oculares.
