Patacas guisadas con costelas de porco

Os guisos de carne con patacas son típicos en calquera rexión do país, e aínda que os ingredientes principais son comúns na maioría das zonas, varían notablemente o resto de alimentos que compoñen a receita. En calquera caso, o resultado final é un prato completo que destaca polo equilibrio nutritivo dos seus compoñentes: a carne, neste caso de porco é o compoñente proteico e as patacas o alimento máis enerxético, dada a súa riqueza en hidratos de carbono. Cantas máis verduras e hortalizas inclúa a receita, máis abundante e variada será a cantidade de vitaminas, minerais, ademais de fibra. O aceite, xunto coa costela de porco, é o ingrediente máis graxo da receita, e dado que non se utiliza moito aceite para a súa elaboración, pódese considerar un prato enerxético pero non excesivamente calórico.
O estilo de vida actual obriga a dedicar menos tempo na cociña, polo que guisos como este quedan relegados a ocasións especiais. Con todo, tendo en conta que se trata dunha receita económica, moi nutritiva e sinxela de elaborar sería interesante incluíla na alimentación habitual, co fin de variar máis o tipo de dieta, á vez que se inclúen as patacas, un alimento básico, cuxo consumo vai en declive nos últimos anos. Ademais, as patacas son alimentos que combinan practicamente con todo tipo de alimentos, o que fai posible variar ao máximo o menú: patacas con legume, con tenreira, con bacallau, con bonito...
A suxestión de menú para conseguir unha comida equilibrada, saudable e axeitada para todas as idades: un primeiro prato de verdura ou ensalada, o guiso de patacas con costela de porco e un lácteo de sobremesa.