A cirurxía transluminal empeza a dar os seus primeiros pasos en España

• Autor: Por mediatrader
• Data de publicación: Xoves, 15deNovembrode2007

O Hospital Son Llátzer de Palma de Mallorca e o Clínico de Barcelona convertéronse nos primeiros centros sanitarios españois que empregan con éxito a chamada cirurxía transluminal, a que se realiza aproveitando os orificios naturais do corpo, como a boca, o ano ou a vagina.

Esta técnica, que por agora se utiliza para extraer vesículas e apéndices, ten moitas vantaxes: diminución da dor postoperatoria e do tempo de recuperación do paciente, maior facilidade de acceso a certos órganos, redución do risco de infeccións, e mellor resultado estético, porque aforra cicatrices ou deixa algunhas apenas visibles.

No caso do Hospital Son Llátzer de Palma, aplicouse con éxito a tres mulleres con cálculos na vesícula, segundo informou o Goberno Balear. Os cirurxiáns extirparon as vesículas das pacientes a través da vagina.

No Clínico de Barcelona, a vesícula dunha paciente foi desaloxada pola boca. Os cirurxiáns introduciron un endoscopio no estómago, a través do esófago. Neste órgano faise unha pequena incisión e accédese á vesícula. Entón, a vesícula extráese e desalóxase do corpo a través do orificio feito no estómago cara ao esófago e a boca.

Os expertos están a ensaiar agora esta mesma técnica con animais para extraer outros órganos, como riles ou bazos. Tamén se está experimentando en porcos a colocación de by-pass “” gástricos accedendo pola boca e o recto, á vez.