As tiras reactivas para o control dos niveis de glucemia en pacientes con diabetes , un complemento “imprescindible” para coñecer mellor a enfermidade e evitar as súas “custosas” complicacións, deben ser de libre acceso en toda España, tal como reclamou esta semana Ricardo García-Maior, xefe do Servizo de Endocrinoloxía do Hospital Universitario de Vigo e presidente da Federación Española de Diabetes (FED).
García-Maior explicou que este tipo de material tan só supón o 0,6% do gasto sanitario, mentres que o diagnóstico e tratamento das complicacións asociadas ao control insuficiente da diabetes representa preto do 50% do orzamento sanitario para esta patoloxía. “Se a maior partida do gasto sanitario débese ás complicacións asociadas á diabetes, resulta lóxico pensar que se debería investir máis en prevención, diagnóstico precoz e educación (tanto do paciente como do persoal sanitario implicado), o que permitiría abordar a diabetes de forma integral”, sinalou o presidente da FED. Hai que previr e tratar a enfermidade desde os seus inicios, é dicir, “mesmo en pacientes tratados tan só con dieta e exercicio físico”, apuntou.
A responsable do Servizo de Endocrinoloxía do Hospital Clínico San Carlos de Madrid, Natalia Pérez, comentou que se non se fixeron estudos suficientes para probar a eficacia do autocontrol en pacientes tratados con antidiabéticos orais (ADOs) é porque “se tende a ver o autocontrol como un fármaco e non como un instrumento de axuda para o mellor coñecemento da diabetes”. Ambos destacaron ademais a importancia de mellorar a coordinación entre os endocrinólogos e os médicos de Atención Primaria para o correcto tratamento da enfermidade.
“Nalgúns casos, o enfermo chega tarde á consulta e pérdese capacidade de acción para previr as complicacións, problema que se solucionaría cunha boa coordinación de ambos os chanzos da atención; isto é, co diálogo entre profesionais”, informou a FED nun comunicado. Por todo iso, botan en falta unhas guías de consenso, elaboradas por entendidos, sobre o autocontrol da glucemia en sangue capilar (ACGS) e a súa frecuencia óptima de realización segundo o tipo de diabetes e o tratamento seguido por cada paciente, reclamaron desde a federación.
