A obesidade agrava os efectos da asma, segundo un estudo

• Autor: Por mediatrader
• Data de publicación: Xoves, 24deMaiode2007

Un estudo dado a coñecer onte na Conferencia Internacional da Sociedade Torácica de Estados Unidos, que ten lugar en San Francisco, sinala que a obesidade, ademais de provocar diabetes e problemas cardiovasculares, tamén fai máis graves os efectos da asma.

O traballo, levado a cabo con tres mil adultos asmáticos e desenvolvido por médicos do Hospital Emory Crawford Long, de Xeorxia, constata que o mal tiña dimensións graves e moito máis persistentes nas persoas máis obesas. Ese feito adquire especial importancia en Estados Unidos, onde a obesidade se converteu no que algúns expertos cualifican como “unha epidemia”. Nunha poboación de pouco máis de 300 millóns de estadounidenses “aproximadamente o 65% dos adultos maiores de 18 anos teñen sobrepeso ou son obesos”, segundo o investigador Brian Taylor.

O incremento da obesidade foi paralelo a un aumento substancial na incidencia de asma, apuntou Taylor, que detallou que a análise demostrou que máis do 66% dos obesos sinalou que sufría continuos problemas causados pola asma. Ademais, e en comparación con xente de peso normal, un 36% tiña maiores probabilidades de ausentarse do traballo debido á persistencia dos síntomas.

Así mesmo, podería existir un vínculo entre a obesidade e a leptina, unha hormona producida polos tecidos grasos que regula o peso corporal, segundo indicaron os científicos. Outras investigacións indicaron que é posible que a leptina contribúa á inflamación das vías respiratorias en pacientes asmáticos.