A Organización Mundial da Saúde (OMS) decidiu manter a alerta de pandemia de gripe A, tras escoitar a última avaliación do Comité de Emerxencia do organismo. Esta comisión indicou que, aínda que “o período de actividade máis intensa parece pasar en moitas partes do mundo”, aínda é necesario que os países manteñan a vixilancia respecto da pandemia.
A directora xeral da OMS, Margaret Chan, augurou que a actividade do virus H1N1 continuará en activo, polo que convocou unha nova reunión do Comité de Emerxencia para mediados de xullo, “cando xa estea dispoñible a información sobre a estación invernal de gripe do hemisferio sur”. Despois desta asemblea, decidirase se hai que manter o nivel de alerta, declarar que a pandemia pasou ou trasladala a unha fase de transición “post-pico”.
A gripe A (H1N1) descubriuse en abril de 2009 en América do Norte e o 11 de xuño dese ano declarouse como a primeira pandemia do século XXI. Desde entón, provocou a morte dunhas 18.000 persoas, confirmadas por probas de laboratorio, en todo o mundo, fronte ás 500.000 mortes anuais que se atribúen á gripe estacional. Na actualidade, o virus está máis activo nalgunhas zonas do Caribe e do sueste asiático, ademais de en determinados enclaves de Chile.
