A Unión Europea (UE) só permitirá a partir de agora a venda de medicamentos con plantas medicinais se se rexistraron previamente e recibiron a autorización comunitaria. Esta autorización está condicionada a que o produto en cuestión demostre a súa inocuidad e a súa eficacia ou efectos positivos, segundo anunciou Bruxelas.
Estas novas regras “non pretenden prohibir as plantas medicinais, senón regular mellor os produtos que proceden destas herbas”, recalcou o portavoz comunitario de Saúde e Protección ao Consumidor, Fréderic Vincent, en resposta á polémica suscitada por quen acusan á UE de querer prohibir as plantas medicinais tras ceder ás presións da industria farmacéutica. O obxectivo da directiva é “simplificar o procedemento” para o rexistro dos medicamentos que non son resultado do traballo farmacéutico, senón da “tradición” e “reforzar” a confianza do paciente ou consumidor sobre estes produtos, apuntou Vincent.
O portavoz sinalou que hai “varios centenares” de produtos para os cales os Estados membros solicitaron a autorización, pero non indicou cifras concretas de cantos se aprobaron nin se se rexeitaron algúns. O traballo continúa e “nos próximos meses” Bruxelas estima que a listaxe completa poderá publicarse en Internet, aínda que a lista podería variar dun país a outro.
Ata a adopción das novas normas, un produtor de medicamentos herbolarios tiña que superar un proceso “moi duro” baseado nos mesmos criterios da industria farmacéutica clásica. Coas modificacións, o proceso é menos esixente, aínda que o custo de validación oscila entre 5.000 e 10.000 euros segundo os exemplos postos polo portavoz, que precisou que cada país ten sistemas diferentes e o seu custo tamén varía.
“Chegamos ao final dun longo período de transición, no que fabricantes e importadores de medicamentos tradicionais a base de plantas tiveron tempo suficiente para demostrar que os seus produtos presentan un nivel aceptable de inocuidad e de eficacia. Os pacientes poden agora ter confianza nos medicamentos tradicionais a base de plantas que adquiren na UE”, declarou nun comunicado o comisario de Saúde, John Dalli.
