Andalucía converterase na primeira comunidade autónoma en prohibir a tenencia como mascotas de animais potencialmente perigosos como caimanes, crocodilos e serpes venenosas, así como réptiles de máis de dous quilos de peso, primates e mamíferos salvaxes superiores.
Ademais, prohibirase “taxativamente” ter como mascotas a peces e artrópodos cuxo veleno represente un risco para as persoas, segundo explicou a conselleira andaluza de Gobernación, Evangelina Naranjo, quen indicou que os propietarios deste tipo de animais deberán depositalos, en colaboración con distintos organismos como o Seprona da Garda Civil ou o Consello de Veterinarios andaluz, en espazos adecuados, como zoolóxicos ou centros de acollida.
Esta é unha das novas normas que recolle o decreto andaluz sobre tenencia de animais potencialmente perigosos elaborado pola Xunta e que será aprobado polo Consello de Goberno a finais deste ano ou principios do próximo.
Os propietarios e os establecementos que comercian con estes animais disporán de seis meses para regular a súa situación e cumprir cos requisitos que establece o decreto, que tamén impón novas normas aos propietarios de quince especies de cans potencialmente perigosos, como pit bull terrier ou rottweiler.
Os cidadáns que posúan un animal potencialmente perigoso sen licenza ou teñan na súa poder unha especie prohibida terán que pagar multas de ata 15.025 euros coa nova normativa autonómica.
