O Goberno prohibiu a comercialización de herbas medicinais a granel a partir de abril aos propietarios de postos ambulantes. Ata agora, só os establecementos permanentes de herbodietética tiñan a obrigación de cumprir a normativa sanitaria que o impedía pero, tras a aprobación do RD 199/2010, os vendedores ambulantes enfróntanse a multas de ata 3.000 euros.
As plantas medicinais que se comercialicen no futuro nos mercadillos deberán de estar envasadas, marcadas co rexistro que identifica ao empaquetador, coa súa data de caducidade e o visto e prace de seguridade alimentaria. “O maior beneficiado con este cambio será o consumidor”, asegura Aurora Vea, presidenta da Federación Española de Asociacións de Herbodietética.
A representante dos herboristas pon de manifesto que con esta nova regulación que preserva a adecuada conservación dos produtos, tamén se preserva a saúde dos compradores xa que “se evitarán as mesturas de plantas que fan algúns vendedores sen a formación adecuada que poden ser prexudiciais para a saúde do consumidor”.
Desde a Federación Española de Asociacións de Herbodietética móstranse satisfeitos coa adopción desta medida coa que finaliza a “situación discriminatoria” que existía no sector. “Aplaudimos que o Goberno lles obrigue a respectar as mesmas normas sanitarias que ao resto pero non estamos en contra da venda en mercadillos, é un modo de promoción para o sector”, asegura Aurora Vea.
