Bután, un pequeno estado do extremo oriental da cordilleira do Himalaya, converteuse no primeiro país do mundo que prohibe a venda e o consumo público de tabaco. Así, hoteis, tendas, restaurantes e bares teñen de prazo ata hoxe para desfacerse do tabaco almacenado.
A nova normativa, aprobada o pasado xullo polo Parlamento butanés, establece multas de 225 dólares para aqueles que rompan a prohibición, unha cifra que se antolla moi elevada para un país tan empobrecido como Bután, e considera «tráfico» a venda de cigarros no estado.
No entanto, permítese aos fumadores introducir tabaco para uso persoal, pero só despois de pagar un imposto do 100% do seu valor na aduana e unicamente poderán consumilo en lugares privados.
Con esta medida preténdese protexer a saúde dos cidadáns e o medioambiente de Bután, un país moi concienciado neste sentido, e non se espera que sexa moi problemática xa que, segundo cifras oficiais, só un 1% dos preto de dous millóns de habitantes do estado fuma.
