Un equipo científico do Instituto de Investigación Biomédica Whitehead de Cambridge (Estados Unidos) logrou desenvolver células nai deseñadas para corrixir unha grave enfermidade hereditaria do sangue, unha anemia drepanocítica tamén chamada de células falciformes.
As persoas que padecen este trastorno soportan unha anomalía na hemoglobina. A orixe deste problema está na mutación do xene encargado da produción de hemoglobina. As persoas que o padecen sofren anemia crónica e numerosas complicacións. O seu sistema inmune é máis vulnerable ás infeccións, padecen crises de dor e problemas respiratorios, entre outros trastornos.
Os investigadores estadounidenses reprogramaron e manipularon xeneticamente células da pel dun rato con esta forma rara de anemia. O transplante celular logrou xerar células sanguíneas sas que eliminaron calquera rastro da enfermidade.
Este novo avance prodúcese poucos días despois de que dous grupos científicos mostrasen ao mundo que unha sinxela célula adulta podía transformarse nunha célula pluripotencial e converterse en case calquera tecido. Un fito científico que permitirá dispor dunha fonte inesgotable de células para crear tecidos e órganos listos para transplante, sen rexeitamento inmunológico nin problemas éticos.
