Un equipo de científicos da Universidade de Saint Andrews (Escocia) desenvolveu un pequeno parche metálico capaz de emitir luz, que facilitará o tratamento dos cancros de pel máis leves.
Este enxeño, operado cunha batería de peto fácil de transportar, permitirá aos pacientes ser tratados na súa casa ou nos ambulatorios, en lugar de ter que pasar horas no hospital.
O invento consiste simplemente nunha adaptación do actual tratamento con terapia fotodinámica, no que o paciente recibe emisións controladas de luz tras untarse as partes do seu corpo afectadas cunha crema fotosensible contra o cancro. O problema é que actualmente esta terapia faise con grandes focos de luz que obrigan ao enfermo a estar varias horas encerrado nunha cámara especial nun hospital mentres recibe o tratamento.
O novo parche realiza a mesma función, pero é máis pequeno, lixeiro e cómodo de levar. “Aplicando a última tecnoloxía a un tratamento existente, púidose desenvolver unha fonte de luz compacta para tratar o cancro de pel máis comúns”, sinalou Ifor Samuel, un dos científicos responsables do parche.O invento contén a súa propia fonte de luz, un diodo formado por unha fina película de material orgánico colocado entre dous contactos eléctricos. A luz emítese cando unha corrente de baixa voltaxe atravésao.
O paciente pódeo levar de forma similar a un parche adhesivo, mentres que a batería transpórtase coma se fose un reprodutor de MP3.
Os tratamentos con terapia fotodinámica só son efectivos para os cancros menos graves, xa que os máis serios só poden tratarse con radioterapia, cirurxía ou quimioterapia.
O próximo paso da Universidade de Saint Andrews será buscar financiamento para comercializar os novos parches, que non se descarta poidan usarse tamén contra o envellecemento ou a acne.
