A ruta que utilizan as bacterias para degradar un compoñente que forma parte da estrutura da nicotina, o ácido nicotínico, e utilizalo como alimento foi desentrañada por investigadores do Consello Superior de Investigacións Científicas (CSIC). Publicado no último número da revista “Proceedings” da Academia Nacional de Ciencias de Estados Unidos, este descubrimento podería permitir o desenvolvemento de filtros biolóxicos cos que reducir as emisións contaminantes desta sustancia.
O traballo, dirixido polo investigador Eduardo Díaz, do Centro de Investigacións Biolóxicas (do CSIC), en Madrid, tamén permitirá o desenvolvemento de novos procesos biotecnológicos para a síntese de moléculas precursoras de insecticidas e compostos de interese farmacolóxico. O descubrimento de xenes similares en bacterias patógenas humanas abre ademais unha vía de estudo sobre o control do proceso de infección en determinados microorganismos patógenos.
Os investigadores do CSIC identificaron os xenes implicados na ruta de degradación aeróbica (con osíxeno) do ácido nicotínico na bacteria “Pseudomonas putida”, empregada con frecuencia como modelo en investigación ambiental. “A pesar de que o ácido nicotínico, tamén coñecido como vitamina B3, é un composto natural moi abundante, só se conseguiu describir a súa ruta de degradación en ausencia de osíxeno”, explicou Díaz, que apuntou que o achado abre unha liña de investigación para tratar a contaminación por nicotina derivada do fume do tabaco e das factorías tabaqueiras. “A partir deste achado, poderían deseñarse variantes de Pseudonomas ‘putida’ que degradasen de forma eficaz e completa a nicotina, e desenvolver biofiltros con elas para reducir as emisións tóxicas deste compoñente”, explicou o científico.
Os autores do traballo, ademais de describir os xenes que compoñen a mencionada ruta, estudaron a súa presenza noutros tipos de bacterias e descubriron que os xenes obxecto do estudo están presentes en bacterias do chan e nalgunhas patógenas para o ser humano. Iso permite abrir unha nova vía de investigación ao redor destes axentes, xa que traballos científicos previos describiron como o ácido nicotínico intervén na modulación do carácter patogénico de certos microorganismos.
