Unha investigación desenvolvida pola Universidade de Illinois (Estados Unidos) confirmou a presenza masiva de bacterias asociadas á carie na saliva de bebés sen dentes. Para evitar o desenvolvemento desta enfermidade dental, os pais deben de reducir ao máximo os alimentos e bebidas azucaradas que inxeren os nenos e é aconsellable que limpen as encías dos bebés, tal e como recomenda a Academia Americana de Odontoloxía Pediátrica.
“Antes críase que isto ocorría entre os 19 e 33 meses de idade, pero en realidade prodúcese a unha idade moito menor”, afirma Kelly Swanson, autor da investigación. O científico considera que os nenos nados en familias cun nivel socioeconómico baixo, cunha dieta rica en azucres e con nais con niveis educativos baixos teñen un 32% máis de posibilidades de desenvolver caries.
Asegura que a cifra de nenos que ten caries cando inicia a gardaría ascende ata o 40%. Por iso, destaca que a educación dos pais é o alicerce esencial da prevención ante esta enfermidade infecciosa.
No transcurso da investigación, os científicos descubriron grazas a tecnoloxías melloradas de ADN que a presenza de bacterias orais nos nenos sen dentes era moito máis diversa do que se cría, con centos de especies distintas. “As caries dentais son o resultado de moitas bacterias en comunidade, non dun só patógeno”, explica Swanson.
