Inglaterra era o único lugar do Reino Unido, ata onte, que permitía acender un cigarro en lugares públicos e pechados. Desde este domingo está en vigor a prohibición de fumar nestes espazos.
A medida afecta a todo tipo de establecementos e lugares de traballo, así como a estacións de ferrocarril, centros de lecer e vehículos de empresa utilizados por máis dunha persoa. Tampouco se permiten as salas para fumadores nas empresas.
Os propietarios de bares e restaurantes que incumpran a normativa exponse a multas de ata 3.700 euros. Pola súa banda, os particulares que fumen en lugares onde non está autorizado o hábito serán sancionados con multas de 74 euros.
“Un país libre de fume mellorará a saúde de miles de persoas, reducirá a tentación de fumar e animará aos fumadores a deixalo”, dixo o novo ministro británico de Sanidade, Alan Johnson, quen lembrou que a partir de outubro elevarase de 16 a 18 a idade mínima legal para comprar tabaco.
Richard Peto, profesor de estatísticas médicas da Universidade de Oxford, afirma que a medida que acaba de facerse efectiva en Inglaterra permitirá salvar polo menos medio millón de vidas ao ano que se perden por culpa do tabaco.
En Irlanda, a prohibición de fumar en lugares públicos, en vigor desde 2004, propiciou unha redución das vendas de cigarros en torno ao 17%.
