A prohibición de fumar en lugares públicos pechados en Inglaterra aplicarase a partir do 1 de xullo de 2007, segundo informou o Goberno británico. Alemaña, pola súa banda, aplicou a prohibición en restaurantes, pero non en cafetarías, bares e cervecerías.
A medida adoptada en Inglaterra é similar ás aplicadas na República de Irlanda e Escocia, onde non se pode fumar en lugares públicos desde marzo de 2004 e marzo de 2006, respectivamente, mentres que en Irlanda do Norte e Gales a data está fixada para abril de 2007.
O Goberno considera que impedir fumar en lugares pechados protexerá a saúde de todo o mundo. “As probas científicas e médicas son claras”, dixo a ministra de Sanidade, Patricia Hewitt, e engadiu que o tabaco causa “unha serie de condicións médicas serias, incluído o cancro de pulmón, enfermidades cardíacas e a síndrome de morte súbita nos nenos”.
En Alemaña, a prohibición de fumar afecta os restaurantes que non teñan habilitados espazos para iso, edificios, transportes públicos, así como a hospitais e escolas. Exentos quedan cafetarías, bares e clubs de copas.
A ministra de Sanidade, a socialdemócrata Ulla Schmidt, definiu o compromiso alcanzado como “aceptable”. Desde a oposición, os Verdes cualificaron o acordo de insuficiente “”, especialmente porque exclúe da prohibición a bares e cafetarías.
