Investigadores da Universidade de Granada desenvolveron un instrumento capaz de detectar e medir de forma continua a presenza de benzopireno na auga e no aire. Esta sustancia é un hidrocarburo aromático policíclico (HAP) que se cre pode orixinar cancro. Os científicos esperan poder aplicar este sistema nas estacións de control ambiental das cidades.
Estes expertos, dirixidos polo catedrático da Universidade de Granada Alberto Fernández, aplicaron a súa experiencia no campo da luminiscencia molecular, como se denomina ao fenómeno que presentan certas moléculas que responden a algún tipo de excitación externa emitindo unha radiación electromagnética en forma de enerxía radiante.
Dependendo de certas características desta emisión, como a lonxitude de onda e o tempo de vida, pódese determinar o tipo de molécula que a produce, así como a súa concentración. “Esas respostas moleculares son sinais que non se poden medir”, afirma Fernández, que di que para iso se necesitan sensores que, ao entrar en contacto coas moléculas, desencadeen as súas propiedades luminiscentes.
Aí é onde os investigadores centraron os seus esforzos, experimentando con materiais que actúan como fases sensoras. Cada material experimentado é capaz de atrapar unha molécula determinada, polo que os autores tiveron que seleccionar unha que fose representativa do grupo dos hidrocarburos aromáticos policíclicos.
Escolleron o benzopireno -cuxos niveis de concentración reflicten os doutros HAP semellantes- sustancia que se atopa adherida a outras partículas da atmosfera ou o po, e que pode pasar desde aí á auga.
Mediante o sistema desenvolvido polos investigadores granadinos, pódense recoller mostras de benzopireno de forma directa, tanto do aire como da auga, para posteriormente estimular a luminiscencia do composto a través dunha fibra óptica, que actúa tamén como transmisor da resposta ata un sistema que analiza a lonxitude de onda da emisión.
O novo aparello será o único capaz de medir o nivel de benzopireno permitido pola Unión Europea (UE) para a auga de consumo humano, segundo a Universidade, que informou de que xa se probou con éxito o prototipo na rede de abastecemento de Granada e a súa área metropolitana.
