Un 40% dos europeos terá predisposición a desenvolver alerxias para 2040, segundo a Academia Europea de Alerxia e Inmunología Clínica (EAACI), cuxos membros pediron no Parlamento Europeo que as alerxias se inclúan no Programa de Investigación da Unión Europea (UE) “Horizonte 2020”.
Durante a presentación esta semana dos datos actualizados sobre as alerxias en Europa, EAACI sinalou que o seu obxectivo é aumentar a concienciación sobre o problema de alerxias que sofren moitos europeos, sobre todo nenos. Por iso, apostan por investir en investigación e innovación que reduza o impacto e mellore a calidade de vida destes pacientes.
A academia está “preocupada porque as propostas para a investigación futura na UE no marco de Horizontes ‘2020 e a Estratexia de Saúde para o Desenvolvemento non inclúen as alerxias”, afirmou a responsable de EAACI Antonella Muraro. “EAACI pide aos membros do Parlamento Europeo que inclúan as alerxias como unha área para investigación futura na UE durante as súas actuais deliberacións sobre estes programas”, expresou.
A prevalencia das alerxias aéreas e a asma en Europa multiplicouse por catro nos últimos 30 anos, ata afectar a entre o 15% e o 40% da poboación. Os máis novos son quen máis sofren a crecente incidencia das alerxias, cun de cada tres menores afectados. Nos últimos 10 anos, as reaccións alérxicas en nenos multiplicáronse por sete. As alerxias convertéronse nun buraco de perdas económicas. Segundo a Declaración Europea de Inmunoterapia, publicada por EAACI, o custo farmacéutico da asma é de 3.600 millóns de euros anuais e o custo sanitario 4.300 millóns de euros ao ano.
En total, o 15% da poboación europea recibe tratamento a longo prazo por alerxias ou asma, o que converte a estas dúas enfermidades nas razóns máis comúns para recibir fármacos entre o grupo de idade dos mozos. A asma e a rinitis fan perder máis de 100 millóns de días de traballo e escola en Europa. Se non se controla adecuadamente, os seus crecentes custos poderían deteriorar a economía da saúde pública.
