Unha enquisa do Eurobarómetro difundida pola Comisión Europea (CE) recolle que o 42% dos españois non practica deporte nunca, fronte ao 39% que o fai polo menos unha vez por semana. O principal motivo que alegan os entrevistados para xustificar a falta de actividade física é a ausencia de tempo (45%).
O noso país sitúase así algo por baixo da media comunitaria en materia deportiva. No conxunto da UE, un 40% dos cidadáns fan deporte polo menos unha vez por semana, fronte ao 39% que non o practica nunca. Os cidadáns da UE que superan de forma ampla a media comunitaria son os suecos (o 72% fai deporte polo menos unha vez por semana), finlandeses (72%) e daneses (64%). No outro extremo da clasificación, áchanse Bulgaria (o 82% dos cidadáns non fai nunca deporte), Grecia (79%), Hungría (71%), Rumania (69%), Italia (67%), Polonia (66%) e Letonia (65%).
En España, de igual forma que na UE, os homes practican máis deporte que as mulleres. Esta diferenza é sobre todo marcada no grupo de idade entre 15 e 24 anos, no que o 28% dos homes españois fai exercicio (19% no conxunto da UE), fronte ao 16% de mulleres (8% na UE).
Entre os motivos esgrimidos polos españois para practicar deporte destacan a mellora da saúde (61%), a necesidade de relaxarse (40%), a mellora da forma (29%), a mellora da aparencia física (28%), a diversión (25%) e a perda de peso (18%). A maior parte de enquisados (53%) prefire facer deporte nun parque ou na natureza, mentres que só o 11% vai ao ximnasio.
