O descubrimento dun dano nas células da saliva pode predicir unha afección similar nos pulmóns que posteriormente deriva en cancro nos fumadores, segundo investigadores da Universidade de Texas (Estados Unidos). Estes expertos esperan que se poida predicir este tipo de cancro con só pasar un algodón pola boca dos fumadores, evitando as dolorosas e perigosas biopsias que se realizan actualmente nos pulmóns.
As investigacións realizadas polo equipo do doutor Li Mao poderían tamén levar a probas que permitan predicir outros tipos de cancro, como o de páncreas ou o de vesícula. “O noso estudo abre a porta a aumentar a capacidade de predicir quen ten máis probabilidades de ter cancros relacionados co tabaco”, afirmou Li.
O equipo de Li Mao quería achar a maneira de controlar aos pacientes que consomen o medicamento COX-2 de Pfizer (Celebrex) para seguir con avances na prevención do cancro de pulmón. Esta enfermidade ten poucos síntomas ata que chega a un estado avanzado, o que significa que poucas veces se diagnostica ou trata aos pacientes ata que é demasiado tarde.
Os científicos norteamericanos analizaron dous xenes, o p16 e o FHIT -implicados na aparición da citada enfermidade-, e buscaron danos específicos nas células de 125 persoas que fumaran durante anos. “Conseguimos o mesmo fregando no interior da boca que cunha broncoscopia”, sinala Manisha Bhutan, unha das expertas que participou na investigación.
A través dun proceso chamado metilación conseguiuse acabar co xene p16 nos pulmóns do 23% dos voluntarios, e co FHIT no 17% dos casos. No proceso oral, eliminouse o xene p16 no 19% das probas e o FHIT no 15%. No 95% dos casos nos que os xenes estaban afectados, estábano tanto na boca como nos pulmóns.
