A enfermidade do lupus eritematoso sistemico (LLES) afecta en España a unhas 40.000 persoas, na súa maioría mulleres en idade fértil de entre 17 e 35 anos, segundo os datos a Sociedade Española de Reumatoloxía. Trátase dunha enfermidade autoinmune crónica que provoca que o mecanismo de defensa do organismo comece a atacarse a si mesmo, o que crea un exceso de anticorpos no torrente sanguíneo e causa inflamación e danos nas articulacións, os músculos e outros órganos.
Este feito pon en risco a vida do paciente debido a que pode afectar a calquera órgano do corpo como a pel, o corazón, os pulmóns, os riles ou o cerebro. Con todo, a súa causa é descoñecida, aínda que se sabe que existen factores xenéticos, ambientais e metabólicos que poden influír nesta enfermidade. Neste sentido, os profesionais insisten na necesidade dunha abordaxe precoz para que os afectados respondan de forma positiva aos tratamentos.
Entre as manifestacións clínicas máis frecuentes pódense destacar as do aparello locomotor -dor e inflamación das articulacións-, o cansazo, a febre, a perda de apetito e de peso, a diminución do número de glóbulos brancos, vermellos e plaquetas, manchas no dorso do nariz e nas fazulas, e mesmo trastornos neurológicos como estados de confusión, cefaleas ou convulsións. Por iso e para concienciar sobre esta enfermidade e aumentar o coñecemento dos síntomas co fin de mellorar o diagnóstico, este xoves, día 10 de maio, celébrase o Día Mundial do Lupus.
O ano pasado púxose en marcha en España o primeiro Rexistro de Pacientes con Lupus Eritematoso Sistémico da Sociedade Española de Reumatoloxía (RELESSER), co obxectivo de obter datos e poder desenvolver diferentes estudos que permitan perfeccionar o coñecemento sobre a enfermidade e mellorar a atención dos pacientes. Ata a data, incluíronse 1.562 pacientes de 40 hospitais de todo o país e espérase poder chegar pronto ata os 3.000 afectados.
