O sarampión provoca en Indonesia a morte de 30.000 nenos ao ano, segundo fontes oficiais

• Autor: Por mediatrader
• Data de publicación: Luns, 19deFebreirode2007

A ministra de Sanidade de Indonesia, Siti Fadilah, sinalou hoxe que o sarampión e as súas complicacións derivadas provocan a morte duns 30.000 nenos no país cada ano, o que supón un cada vinte minutos. Trátase dunha das enfermidades máis mortais do país asiático e afecta sobre todo a bebés e nenos de ata catro anos. As complicacións relacionadas coa enfermidade, como a diarrea, a pneumonía ou as inflamacións do oído e do cerebro, poden provocar a morte ou malformacións das persoas contaxiadas, segundo explicou a titular de Sanidade.

No entanto, conseguiuse reducir nas últimas dúas décadas o cociente de mortalidade infantil nun 48% grazas á posta en funcionamento en 1984 de programas rutineiros de inmunización contra a enfermidade. Nesa liña, o programa de inmunización alcanzou en 2006 ao 87% da poboación infantil, fronte a un 80% no ano 2000.

As provincias de Banten, Iacarta, Java Occidental e Oriental inaugurarán precisamente mañá a nova campaña de inmunización. Haberá que esperar ata o próximo mes de agosto para facer o propio nas de Borneo, Célebes, Bali e Nusa Tenggara Occidental.