As farmacias españolas xa poden solicitar o primeiro test que permite detectar a través da suor e dos ouriños o consumo de drogas. Este test permitirá aos pais coñecer se os seus fillos consumiron estupefacientes, xa que pode aplicarse directamente na roupa do consumidor sospeitoso e no mesmo fogar familiar.
O detector, que custará uns 60 euros e é dun só uso, advirte en tres minutos se se produciu consumo de drogas de deseño como anfetaminas, éxtases, ácido ou «speed», así como cocaína, os chamados opiáceos, cannabis ou marihuana.
Arifarm-test, como se denomina, ten un tamaño duns 10 centímetros e está formado por unhas bandas de detección que permiten advertir do consumo de estupefacientes. O detector pode aplicarse directamente na zona das axilas e as costas das camisetas ou polos ou ben mergullarse nos ouriños durante tres minutos. Se pasado este tempo aparece unha soa banda de cor rosa, o resultado será positivo e se se observan dúas bandas de cor será negativo. A inexistencia de bandas coloreadas implicará que o test non se fixo correctamente. No caso de que o resultado sexa positivo, recoméndase confirmalo a través dunha analítica de laboratorio.
