O Ministerio de Sanidade e Consumo ordenou retirar unha marca de zapatos fabricados en China polas graves reaccións alérxicas que provocan. Este calzado contén dimetilfumarato, un produto altamente tóxico que se introduce en bolsitas dentro dos zapatos para combater a humidade e os fungos, cando realmente debería utilizarse xel de sílice.
O calzado en cuestión corresponde á marca Amelia Zaragoza, distribuído en toda España pola empresa New Arian S.L., con sede en Alacante. A alerta foi notificada o martes a través das autoridades de Murcia, onde varios dermatólogos constataron que nos últimos dous meses polo menos cinco pacientes acudiran ao médico cunha alerxia grave e “pouco habitual”.
Tras coñecer os casos destes pacientes, Sanidade trasladou ás autonomías a orde de intervir as partidas de calzado. As correspondentes administracións xa están a proceder á inmovilización e retirada destes artigos para investigar “o impacto da alerxia e o seu alcance”, sinalou o ministro de Sanidade, Bernat Soria.
En todos os casos detectados ata agora trátase de zapatos orixinarios de China
En todos os casos detectados ata agora trátase de zapatos orixinarios de China, aínda que vendidos en tendas de todo tipo. Asociacións de consumidores recibiron numerosas queixas ante as reaccións alérxicas (picor, hinchazón e bochas) que provoca o dimetilfumarato en pés e pernas, e que deben combaterse na maioría dos casos con corticoides, antibióticos e antihistamínicos.
En Italia, os servizos de inspección comisaron recentemente máis dun millón de zapatos que tiñan a sustancia tóxica, mentres que no Reino Unido o problema xa se detectou hai case un ano.
Fallo do sistema
Todoalergias.com advirte de que son varias as marcas afectadas
Desde a organización de consumidores FACUA sinalan que “Sanidade debe atallar o problema de raíz, xa que o dimetilfumarato non se detectou só no calzado, senón tamén en sofás . Todos os días recibimos chamadas de afectados”.
Pola súa banda, a páxina de Internet Todoalergias.com, onde se abriu un foro sobre o tema e creouse unha plataforma de afectados, advirte de que non é só una a marca afectada, senón que hai varias. Así mesmo, apunta que os sobrecitos con dimetilfumarato puideron usarse en todo tipo de produtos. “De feito, xa nos chegou algunha noticia de alerxia por novos produtos”, asegura.
Esta web considera que, neste caso, “o sistema fallou estrepitosamente: os produtos chegaron ao público levando dimetilfumarato; as persoas sufriron alerxias, dermatitis, pero o sistema non se deu por decatado”.
