O Instituto Nacional do Consumo (INC) está a analizar mostras de dúas marcas de calzado sospeitosas de causar irritacións e alerxias na pel dalgunhas persoas. O Ministerio de Sanidade e Consumo xa ordenou, a semana pasada, a retirada de calzado da marca Amelia Zaragoza, fabricada en China.
Esas dúas mostras foron enviadas pola organización de consumidores FACUA, que asegura que os fabricantes desas marcas introducen unhas bolsitas con dimetilfumarato para evitar a proliferación de fungos. O uso desta sustancia, que sería a causa das reaccións alérxicas, con este fin está prohibido na Unión Europea (UE).
O dimetilfumarato é un químico de natureza volátil, o que “facilita que quede impregnado de forma permanente nos artigos cos que entra en contacto, neste caso o calzado”, explica FACUA.
A organización afirma ademais que Francia introduciu na rede europea de alerta rápida de produtos perigosos (RAPEX) unha advertencia sobre catro referencias de zapatos e sete de botas de muller procedentes de China. Trátase de artigos comercializados polas firmas Cache Cache e Patrice Breal, que, segundo FACUA, tamén conteñen bolsitas con dimetilfumarato.
Estes produtos incluídos no RAPEX son as botas Dijabo de cor negra e marrón (referencia 3964005), Chavie de cor negra (9933026, do fabricante Rising Sun), Chazus de cor negra (9933011), Chavia de cor negra (9933015) e Chataz de cor marrón (9933025). Así mesmo, os zapatos Charid de cor amarela e negro (9931015), Cheni de cor negra (9932019), Chamie de cor negra (9932020) e Chapat de cor negra (9931031). Xunto a eles, os modelos de botas Dija P e Chusia foron obxecto dunha campaña de retirada voluntaria, aínda que a presenza de dimetilfumarato non foi confirmada.
Así mesmo, a finais de novembro a rede de alerta europea incluíu unha notificación de Francia sobre outro oito modelos de calzado, fabricados en China e comercializados pola marca Etam, que anunciou a retirada do mercado dos produtos. Concretamente, tratábase das zapatillas deportivas Marie (6258544), as botas Anne Sophie (referencia 6258546), as botas Sioux de cor negra (6260758) e marrón (6260758), as botitas Pocahontas de cor negra (6256860) e marrón claro (6256860), e os zapatos Amandine de cor negra (6256861) e azul mariño (6256861).
