O zolmitriptán, un axente antimigrañoso agonista da serotonina, administrado mediante un espray nasal é altamente eficaz e seguro no tratamento da hemicrania persistente, segundo conclúe un estudo realizado en Estados Unidos.
Esta enfermidade, considerada relativamente rara, atribúese a unha dilatación dos vasos craniais producida pola serotonina. Provoca intensos e repetidos episodios de dor de cabeza, ás veces con escasos minutos de intervalo.
Entre os escasos medicamentos válidos para o seu tratamento destacan o sumatriptán e o citado zolmitriptán -capaz de atravesar a barreira hematoencefálica e actuar directamente no sistema trigeminovascular-, agonistas da serotonina. Ambos adminístranse por vía oral.
O estudo, levado a cabo na Universidade de California en Los Ángeles e no Centro de Tratamento da Hemicrania de Stanford, mostra que a administración mediante espray nasal de zolmitriptán é superior en eficacia, xa que dez miligramos deste fármaco eliminan a hemicrania aos 30 minutos da súa aplicación no 63% dos pacientes.
