Os diabéticos poderían sufrir máis fracturas por mor de que un medicamento indicado para tratar esta doenza, Avadina, da farmacéutica GlaxoSmithKline, actúa sobre unha célula que acelera o proceso de descalcificación dos ósos, segundo un novo estudo publicado pola revista “Nature Medicine”.
O tratamento a longo prazo con este fármaco, tamén coñecido como rosiglitazona, pode provocar osteoporose nos pacientes diabéticos porque impulsa a acción das células osteoclastas, que reabsorben o óso, segundo o traballo. Estudos anteriores xa indicaran que o medicamento impedía a actuación das células osteoblásticas, que forman os ósos. O laboratorio xa admitira que o seu medicamento, utilizado en pacientes coa diabetes tipo 2, aumenta o risco de fracturas en mulleres que seguen o tratamento, tal e como demostrou outro estudo.
Leste mesmo fármaco foi recentemente obxecto doutro descubrimento sobre os seus efectos secundarios. Unha investigación revelou que certos medicamentos administrados no tratamento da diabetes tipo 2 duplican o risco de que o paciente teña problemas cardíacos, entre eles Avadina. A Administración federal de Fármacos e Alimentos (FDA) esixiu entón á farmacéutica que advertise deste risco na etiquetaxe do medicamento.
