Non chegan ao 50% as mulleres con osteoporoses que seguen de forma correcta as doses de calcio e suplementos de vitamina D que lles prescriben, a pesar de que incrementan os efectos do tratamento contra esta enfermidade, segundo o estudo COTAS, no que participaron 900 mulleres posmenopáusicas en tratamento contra a osteoporose.
Este traballo revela que uns niveis adecuados de vitamina D reducen o risco de fractura ata nun 30% no caso de cadeira, boneca, antebrazo e columna. Ademais, a falta desta vitamina e de calcio favorece a aparición doutras enfermidades, como a diabetes ou o cancro.
Os autores do estudo advirten de que ningún tratamento contra a osteoporose debe prescindir da vitamina D. Resulta “fundamental para diminuír a perda de masa ósea asociada a esta enfermidade, fortalecendo a musculatura e evitando así as caídas que provocan as fracturas”, afirma o especialista José Manuel Quesada.
Con todo, un 64% das pacientes en tratamento desta enfermidade en España continúa presentado niveis inadecuados de vitamina D, por encima do 54% de media da Unión Europea (UE).
Os especialistas lembran que a dieta non achega a cantidade diaria recomendada de vitamina D, entre 200 unidades para os adultos menores de 50 anos e ata as 600 para os maiores de 70, nin tampouco a exposición ao sol, polos riscos dos raios ultravioleta. Por iso, aconsellan combinar o consumo de lácteos, zumes e cereais con suplementos de vitamina D.
