Unha nova técnica, coñecida como “ADN fetal”, permitirá aos pais coñecer o sexo do seu bebé ao sete semanas de embarazo a través dunha simple análise de sangue. Mediante esta proba, detectan a presenza de pequenos elementos de cromosomas sexuais masculinos no sangue da nai. Se aparecen, significa que o bebé é un neno.
Esta proba, que xa se implantou nalgúns hospitais europeos, podería ser de gran axuda para familias con trastornos xenéticos asociados ao sexo, como a hemofilia. Neste caso, como o trastorno só afecta os homes, a análise sanguínea evitaría a realización de probas invasivas que determinan o sexo e levan aparellado un risco de produción de abortos involuntarios.
“Poderíase reducir o número de procedementos invasivos que se realizan polas condicións específicas xenéticas”, confirma a doutora Diana Bianchi, da Tufts University School of Medicine. A amniocentesis, pola que se extrae unha cantidade reducida do fluído que rodea ao feto, ou a mostra de vellosidades coriónicas, pola que se recollen tecidos da placenta para a súa análise, teñen un risco de aborto de entre o 1% e o 6%, explica Bianchi.
Con todo, algúns investigadores mostraron a súa preocupación sobre a utilización desta proba. Consideran que podería levar consigo un aumento no número de interrupcións de embarazo nos casos nos que o sexo do bebé non fose o desexado polos pais. Desde outros estamentos profesionais destacan a importancia da ética nestes casos. “O xénero non é unha enfermidade”, lembra a doutora Mary Rosser, do Centro Médico Monterfiore de Nova York.
