American Electric Power, unha das grandes compañías eléctricas de Estados Unidos, chegou a un acordo coas autoridades norteamericanas polo que se compromete a pagar unha multa de 15 millóns de dólares por contaminar, e a destinar outros 4.600 millóns para reducir as súas emisións. Desta forma ponse fin ao litixio iniciado en contra da empresa fai oito anos. Trátase do pacto máis cuantioso alcanzado ata agora en protección ambiental no país norteamericano.
En 1999, a Axencia de Protección Ambiental de Estados Unidos (EPA), oito Estados e 13 grupos ecoloxistas presentaron unha demanda contra a eléctrica por violar unha lei ambiental que esixía a instalación dunha serie de controis para frear a contaminación do aire.
Agora, o compromiso de American Electric Power é reducir na próxima década as emisións de óxido de nitróxeno en polo menos un 69%, e de dióxido de sulfuro nun 79%. Prevé ademais investir 60 millóns de dólares en diversos proxectos de limpeza para mitigar os efectos nocivos das súas emisións no medio ambiente.
Segundo o Departamento de Xustiza estadounidense, trátase do maior pacto de protección ambiental non só pola cantidade de diñeiro que deberá pagar a empresa, senón tamén porque obriga a esta a reducir drasticamente as emisións das súas plantas de enerxía eléctrica.
En total, a empresa acordou eliminar 813.000 toneladas de contaminantes do aire nos próximos anos, o que lle custará 4.600 millóns de dólares. O acordo pon límites ás emisións de 16 plantas eléctricas en cinco Estados.
