O presidente do Comité Español do Fondo da ONU para a Infancia (Unicef), Francisco González-Bo, o asesor científico do Comité, José Area, e o coordinador da Iniciativa Hospital Amigo dos Nenos (IHAN), Luís Ruiz, reuníronse onte coa Comisión de Sanidade do Parlamento Español para pedir o desenvolvemento de accións en favor da lactación materna en España.
Os responsables de Unicef valoraron positivamente o encontro, xa que puideron percibir a sensibilidade e o compromiso dos portavoces dos diversos partidos políticos en relación coa campaña internacional Hospitais Amigos dos Nenos, segundo informou a organización.
Esta campaña, liderada por Unicef e a Organización Mundial da Saúde (OMS) en todo o mundo, ten como obxectivo promover a práctica da lactación materna nos hospitais como unha acción de sanidade pública de importancia fundamental para a saúde básica.
Ata o momento, oito hospitais españois recibiron o galardón de Amigos dos Nenos como recoñecemento internacional polo seu labor na promoción, protección e apoio á lactación materna.
