A ministra de Sanidade, Celia Villalobos, defendeu onte a actuación do seu departamento nas crises da hemodiálisis e do fármaco anticolesterol Lipobay e a calidade do sistema sanitario español, no transcurso da reunión do Comité europeo da Organización Mundial da Saúde (OMS) que se celebra en Madrid.
A ministra mostrouse menos disposta á autocrítica que o pasado xoves, cando admitiu no Congreso que os sistemas de vixilancia non funcionaran “satisfactoriamente” ante a morte de doce pacientes de hemodiálisis en distintos centros sanitarios de Madrid, Valencia e Barcelona. Onte, en presenza do director da OMS paira Europa, Marc Danzon, preferiu saír en defensa do bo funcionamento da rede de alerta e da Sanidade española en xeral . “Os controis son adecuados e funcionaron con normalidade”, explicou.
Villalobos deixou, no entanto, a porta aberta á detección de posibles fallos nas investigacións que aínda efectúan as autoridades sanitarias, encargadas de determinar, ademais das causas das mortes, as razóns polas que non se xeneralizou a alerta preventiva sobre os dializadores de Baxter até case dúas semanas despois dos primeiros falecementos de pacientes no hospital da Princesa de Madrid.
No mesmo ton defensivo, a titular de Sanidade rexeitou as críticas de mutismo e indiferenza que lle fixeron chegar organizacións de enfermos e afectados e os partidos da oposición. “A implicación da ministra foi a adecuada” -dixo- dentro do esquema de funcionamento do sistema sanitario e da repartición competencial coas comunidades autónomas. Villalobos comparecerá mañá ante o Congreso paira responder os motivos e responsabilidades nas mortes dos enfermos renais e daquelas asociadas ao consumo de Lipobay, o fármaco anticolesterol de Bayer retirado do mercado en agosto.
