Acordo para mellorar a rastrexabilidade en toda a produción animal

• Autor: Por xavi
• Data de publicación: Martes, 01 de Abril de 2003

O acordo permite así identificar, garantir e responsabilizar as etapas de produción, transformación e distribución alimentaria. Con isto é posible identificar o papel e a responsabilidade de cada axente que intervén nos distintos elos xa que permite seguir o rastro a través de todas as etapas de produción, transformación e distribución dos animais e os seus produtos.

A orixe deste impulso está na creación, no outono de 2002, do Comité Español de Identificación Electrónica de Animais, que se iniciou co propósito de instituirse como foro de discusión de referencia nacional en materia de identificación electrónica dos animais. Con el é posible unificar criterios, materiais e dispositivos no ámbito da produción animal.

Segundo o MAPA, a identificación electrónica das especies ovina e caprina, equina e porcina son, por esta orde, as prioridades deste comité durante o ano 2003. Trátase doutro proxecto máis dos que o MAPA vén desenvolvendo para estender a rastrexabilidade no conxunto da produción animal nos sectores vacún, porcino, ovino, caprino, equino, avícola, lácteo e rexistro de transportistas de gando.

A implantación e o funcionamento deste sistema obrigou ao MAPA a financiar, de 1997 a 2002, case 12 millóns de euros, que se engaden aos 11,3 millóns achegados pola Unión Europea (FEOGA Garantía). Todo iso axudou a aplicar un sistema integral de rastrexabilidade de gando bovino que consiste en dúas marcas auriculares para todos os animais, iguais en todo o Estado, co mesmo código de identificación ao longo da vida do animal. Ademais, púxose en marcha unha base de datos (SIMOGAN) que rexistra cada nacemento e cada morte, así como cada entrada e saída de bovinos.