Aparece un foco de febre aftosa no Reino Unido

• Autor: Por xavi
• Data de publicación: Mércores, 27 de Febreiro de 2002

Dúas ovellas con lesións na boca, un síntoma típico da enfermidade, foron sacrificadas e as súas mostras foron enviadas ao Laboratorio do Instituto de Sanidade Animal en Pirbright (Surrey). A sospeita desatou a alarma entre gandeiros e autoridades que daban por finalizada esta crise tras o último brote detectado o pasado 30 de setembro.

“Aínda é demasiado pronto para afirmar se se trata dun novo foco de febre aftosa”, afirma o Ministro de Sanidade Animal no Reino Unido, Elliot Morley. De momento activáronse as medidas de prevención básicas, entre elas establecer unha zona de vixilancia ao redor da granxa afectada e permanécese á espera de coñecer os resultados das mostras enviadas ao Laboratorio.

Algúns medios do Reino Unido apuntan dúas posibilidades. A primeira asegura que se trata dun virus que pode sobrevivir durante meses especialmente, en condicións de frío e humidade. E a segunda, que algúns animais poden ser portadores da enfermidade aínda que non presenten os síntomas característicos da enfermidade.