O Consello de Ministros aprobou o pasado venres o decreto que establece a norma de calidade comercial para as patacas de consumo no mercado nacional, informou o Ministerio de Medio Ambiente e Medio Rural e Mariño.
A nova norma busca mellorar a calidade do produto no mercado, orientar a produción ás esixencias dos consumidores e facilitar as relacións comerciais nun marco de competencia leal, contribuíndo así a incrementar a rendibilidade da produción, tendo en conta as normas internacionais na materia, apuntaron desde o Ministerio.
Esta normativa establece dúas categorías de patacas: de primeira e de segunda. Na categoría primeira especifícase que as patacas deberán ser de boa calidade e presentar as características morfológicas regulares do tipo varietal ao que pertenzan. O resto entrarán na segunda categoría, sempre que cumpran os requisitos mínimos establecidos.
Tamén se definen os distintos tipos comerciais existentes no mercado que hoxe día son coñecidos tanto na produción e o comercio como no consumo: “De Primor”, “Novas” e “De Conservación”. As primeiras son as patacas que, ademais de ser cultivadas antes da súa completa maduración natural, deben comercializarse nos días inmediatos á súa recolección.
“Novas” son as cultivadas na súa completa maduración natural e comercializadas nas semanas inmediatas á súa recolección sen mais almacenamento e/ou conservación que o necesario para garantir o desenvolvemento normal do seu proceso comercializador.
Finalmente, “De Conservación” son as cultivadas na súa plena madurez, aptas para a súa comercialización despois de pasar por un período de almacenamento e/ou conservación máis ou menos prolongado, sen diminución das súas cualidades organolépticas.
