Investigadores do Centro de Ecoloxía Química Agrícola do Instituto Agroforestal Mediterráneo (CEQA-IAM) da Universidade Politécnica de Valencia (UPV), xunto coa empresa Ecoloxía e Protección Agrícola (EPA), desenvolveron un novo sistema natural contra o piollo vermello de California (Aonidiella aurantii Maskell), unha das principais pragas que afecta aos cítricos.
Durante cinco anos, os investigadores optimizaron os emisores e estudaron a forma e a época de aplicación, e sobre todo a eficacia deste novo sistema fronte aos tratamentos insecticidas habituais. O resultado final deste estudo é un produto que verá a luz comercialmente este ano co nome de Scalebur, informou a UPV.
O sistema desenvolvido pola UPV e EPA presenta unha serie de vantaxes respecto dos actuais sistemas de control contra o piollo vermello de California. En primeiro lugar, non é un insecticida, senón unha feromona natural, o cal significa que non deixa residuos prexudiciais na froita nin resulta perigoso no seu manexo para os agricultores. Ademais, é moi específico e só afecta o organismo diana, sen afectar á fauna auxiliar e sen provocar desequilibrios, asegurou o centro universitario valenciano.
Vicente Navarro, investigador do CEQA-IAM, estudou tamén a compatibilidade deste produto cos axentes de control biolóxicos do xénero Aphytis. Os resultados “mostran a total compatibilidade dos dous métodos de control, mesmo demostran sinerxías entre si. Todas estas características fan que este produto se admita en agricultura biolóxica, o cal amplía as súas posibilidades de implantación no mercado”.
O piollo vermello de California é unha das pragas de maior importancia económica para a produción de cítricos a nivel mundial. O principal dano causado por esta praga é cosmético, debido á presenza na superficie dos froitos do escudo céreo protector que desenvolven estes insectos e que os fai moi visibles. Esta infestación dos froitos provoca a redución do valor comercial do produto ou o rexeitamento das partidas.
