España é un dos 14 grandes produtores de transxénicos , con 100.000 hectáreas de millo transxénico (o Bt, resistente á praga do trade) plantadas durante 2008, segundo o Servizo Internacional para a Adquisición de Aplicacións Agrobiotecnológicas (ISAAA, as súas siglas en inglés). Cataluña e Aragón son as rexións onde se cultivan o 80% das hectáreas deste millo plantadas en España.
O informe do ISAAA revela que o número de agricultores que cultivaron sementes modificadas xeneticamente creceu no mundo o ano pasado en 1,3 millóns, que cultivaron 10,7 millóns de novas hectáreas. En total, 13,3 millóns de agricultores de 25 países cultivaron 125 millóns de hectáreas de cultivos biotecnológicos -en 2007 foron 114,3 millóns-, o que supón multiplicar por 72 veces a superficie inicialmente cultivada en 1996.
Entre as novidades de 2008 destaca o comezo dos cultivos biotecnológicos en países africanos como Exipto e Burkina Faso. Ademais, un novo cultivo transxénico, a remolacha tolerante a herbicidas, foi sementada comercialmente en Estados Unidos e Canadá por primeira vez o ano pasado.
O traballo destaca ademais que mentres que Francia non sementou transxénicos en 2008, outro sete países da Unión Europea (España, República Checa, Rumania, Portugal, Alemaña, Polonia e Eslovaquia) incrementaron a porcentaxe de cultivos de organismos modificados xeneticamente nun 21%.
