Os datos publicados esta semana por Eurostat, a oficina estatística da Unión Europea (UE), confirman que España foi o Estado membro con maior superficie dedicada á agricultura biolóxica en 2008 ao contar con 1,3 millóns de hectáreas, o 17% da UE. A continuación situáronse Italia, cun millón de hectáreas, e Alemaña, con 0,9 millóns de hectáreas. Ademais, entre 2007 e 2008 España foi, cun 33%, o país da UE que máis aumentou os terreos destinados a este tipo de cultivo.
A terra dedicada aos cultivos respectuosos co medio ambiente no conxunto da UE subiu un 21% entre 2005 e 2008, ano no que supuñan 7,8 millóns de hectáreas, un 7% máis que en 2007, segundo Eurostat. En 2008, o tres usos principais das terras biolóxicas foron os pastos, as terras cultivables e os cultivos permanentes. Das cultivables, as máis importantes eran cereais (44% da superficie convertida en biolóxica); forraxe herbáceo (42%); e legume, patacas, remolacha azucreira, sementes e plantas.
A agricultura biolóxica é aquela que segue un método de produción con accións encamiñadas á protección do medio ambiente e o benestar animal. Este tipo de agricultura evita ou reduce na medida do posible o uso de produtos químicos como, por exemplo, os pesticidas.
